Նոր անուններ «Պատանի լեռնագնաց»-ների շարքում
«Բարձունքի հաղթահարման ուղի» միջոցառման ժամանակ երեխաներին անակնկալ էր սպասվում։ Ակումբի անդամներից յոթը համալրեցին «Պատանի լեռնագնաց»-ների շարքը՝ ստանալով կրծքանշանը և ուղեկցող վկայագիրը։
«Պատանի լեռնագնաց» կրծքանշանը տրամադրվում է այն երեխաներին, ովքեր անցել են նախնական պատրաստության ուսումնական ծրագիրը և կատարել որոշակի բարդությամբ վերելք։ Հայաստանի Հանրապետության տարածքում՝ խառնարանում երկու գիշերակացով Արագածի չորս գագաթների վերելքն է (Հյուսիսային՝ իրական գագաթ), որը սկսվում է Քարի լճից և ավարտվում Գեղարոտի ջրվեժում։ Հայաստանի Հանրապետությունից դուրս՝ 4000մ գերազանցող, ինրպես նաև տեխնիկական միջոցների կիրառմամբ ցանկացած վերելք և ուսումնական ծրագիր անցնելը։
2024թ․-ին ակումբի անդամներից Նարե և Գայանե Հարությունյանները հաջողությամբ հաղթահարել էին Արարատ լեռան գագաթը՝ 5137 մ բարձրությամբ։ Մարիա Մերաբյանը, Սարգիս Անանյանը, Լեոն Հայրապետյանը, Ազատ և Հերբերտ Խոնդկարյանները մասնակցել էին Ռուսաստանի Դաշնության Բեզենգի բարձր լեռնային ճամբարին, որտեղ նրանք ոչ միայն կատարել էին լեռնային վերելքներ, այլև անցել սառցամագլցման և ժայռամագլցման մասնագիտացված դասընթացներ՝ ձեռք բերելով նոր հմտություններ և փորձառություն։
Այս երեխաների նվաճումը խոսում է ոչ միայն նրանց ֆիզիկական պատրաստվածության, այլև ոգու ամրության ու նպատակասլացության մասին։ Նրանք ապացուցեցին, որ նպատակին հասնելու համար անհրաժեշտ են աշխատասիրություն, համառություն և թիմային աշխատանք։ Նրանց օրինակով շատերը կարող են ոգեշնչվել՝ հավատալով, որ նույնիսկ ամենաբարձր գագաթները կարող են հաղթահարվել, երբ կա ցանկություն և հաստատակամություն։ Ակումբի հաջողակ պատանիները այսօր արդեն հանդիսանում են ապագա լեռնագնացների համար օրինակելի կերպարներ՝ իրենց նվիրվածությամբ ու նվաճումներով։
Նրանց հաղթանակը միայն անհատական ձեռքբերում չէ, այլ ողջ ակումբի համար մեծ պատիվ է, քանի որ նրանք իրենց ուժով և գիտելիքներով ներկայացնում են մեզ և հուսով ենք մի գեղեցիկ օր՝ Հայաստանը միջազգային լեռնագնացության համայնքում։
