Երեխաների հետ գիշերակաց քարանձավում
Երկու հեքիաթային գիշեր Լաստիվերի քարանձավում
Այս տարի արդեն երկու անգամ եղել ենք Լաստիվերում։ Մեր նպատակն էր ոչ միայն վայելել Խաչաղբյուրի կիրճի գեղեցկությունը և փոքրիկ ջրվեժներով լի տեսարանները, այլև՝ գիշերել հենց Լաստիվերի քարանձավում։
Առաջին անգամ գնացինք ավելի ցուրտ եղանակին, երկրորդը՝ անհամեմատ տաք։ Յուրաքանչյուր այց ուներ իր մթնոլորտը․ մի դեպքում բնությունը ծածկված էր ձյան ճերմակով, իսկ մյուս անգամ՝ նոր բողբոջող կանաչով ու սպիտակ ծաղիկներով։
Երկու արշավների ժամանակ էլ երեխաները իրենց հետ բերել էին ձկնորսական կարթեր՝ ձուկ բռնելու հույսով։ Չստացվեց, բայց դա չխանգարեց՝ իրենց ոգևորությունն ու ջանքը էլի մեծ արժեք ունեցան։
Քարանձավում գիշերելու փորձառությունը
Քարանձավում մի ամբողջ օր անցկացնելն ու գիշերելը կարծես հազարավոր տարիներ հետ տարավ մեզ՝ այն ժամանակները, երբ մարդն իր գոյատևման ճանապարհին առաջին անգամ ապաստան գտավ քարանձավում։ Այդպիսի վայրում քնելը մի տեսակ բնազդային հանգստություն ու ապահովության զգացում էր տալիս, կարծես ի ծնե ծանոթ միջավայրում լինեինք։
Վառարանի ջերմությունն ու կրակի խաղը լրացնում էին քարանձավային միջավայրը։ Իսկ պատուհանից բացվող տեսարանը՝ անտառ, գետ, կիրճ ու մշուշված ժայռեր, գեղարվեստական ֆիլմ հիշեցնող տեսք էր հաղորդում ամբողջին։
Երեխաները վառարանի վրա կարտոֆիլի պլեճ պատրաստեցին։ Համը աննկարագրելի էր, որովհետև բոլորը մասնակցել էին պատրաստման ընթացքին։ Քնելուց առաջ խաղացինք, մի լավ ծիծաղեցինք, հետո քարանձավը լռեց, ու կեսգիշերին օդում միայն երեխաների հանդարտ շնչառությունն էր։
Արշավի ավարտն ու սահմանափակումները
Հաջորդ օրը, լավ քունն առնելուց հետո, հավաքվեցինք ու վերադարձանք։ Այս արշավների միակ «մինուսը» այն է, որ չենք կարողանում մեծ խմբով գնալ, որովհետև քարանձավում իդեալական թիվը շուրջ տաս մասնակից է։ Բայց ոչինչ։ Դեռ աշնանն էլ կգնանք 
Ինչու՞ է սա արժեքավոր երեխաների համար
Այս արշավները միայն արկածներ չեն։ Դրանք իրական դպրոց են՝ բնության գրկում։ Քարանձավում գիշերելը, կրակի շուրջ հավաքվելը, միասին պատրաստելը, լեռներում քայլելն ու պարզապես լռությանը լսելը ձևավորում են այնպիսի արժեքներ, որոնք դասարանում չեն տրվում՝
ինքնուրույնություն պատասխանատվություն թիմային համագործակցություն բնության հանդեպ հարգանք
Կոչ ծնողներին
Եթե մտածում եք երեխաներին նման փորձառություն պարգևելու մասին, մի հապաղեք։ Բնությունը միշտ պատրաստ է ընդունել մեզ՝ իր պարզությամբ, մաքրությամբ և լռության մեջ թաքնված խոր իմաստով։
