Հարցերով գագաթ բարձրացողները և խմբի անպարտելի դարպասապահը
Միշտ փորձում ենք խրախուսել երեխաներին ոչ միայն իրենց քայլարշավներին և լեռնային վերելքներին ակտիվ մասնակցության, ցուցաբերած կամքի և դիմացկունության համար, այլև նրանց այլ առանձնահատկությունների և դրական հատկանիշների համար։ «Բարձունքի հաղթահարման ուղի» միջոցառման ժամանակ հենց այսպիսի հավաստագրեր հանձնեցինք երեխաներին, ինչը լայն ժպիտ էր առաջացրել ոչ միայն նրանց, այլև հանդիսատեսի դեմքին։
Մարիա Մերաբյանը և Սարգիս Անանայանը ստացան «Ամենաշատ մտածելու տեղիք տվող արշավական» անվանակարգի հավաստագրեր՝ հետևյալ բովանդակությամբ․ «Սույնով հավաստվում է, որ (անուն, ազգանուն) հանդիսանում է «4 գագաթ լեռնային ակումբի» ամենահետաքրքրասեր արշավականը, ով յուրաքանչյուր արշավի ընթացքում իր անսպառ հարցերով խմբի ուղեկցորդներին ստիպում է կենտրոնացնել ուշադրությունը, մարզել մտավոր կարողությունները և երբեմն ստիպում ուղեցորդներին Google-ի կարիք զգալ և շարժել երևակայությունը։ Հարցերի միջին արագությունը – 10 հարց րոպեում․ Հարցերի ռեկորդային քանակը – հաշվարկը դեռ շարունակվում է․ Հատուկ հարցերի օրինակ — «Այս քարերը քանի տարեկան են․․․ կարո՞ղ ենք քնած հրաբուխին արթնացնել, եթե բարձր գոռանք ․․․ իսկ եթե անձրև գա, բայց արև լինի, մենք կշոգե՞նք, թե՞ կմրսենք ․․․ Իսկ մենք խմբով ե՞րբ ենք Էվերեստ բարձրանալու ․․․»։ «Ամենաշատ մտածելու տեղիք տվող արշավական» անվանակարգը շնորհվում է «անուն, ազգանուն»՝ ցանկանալով, որ երբեք չդադարի հարցեր տալ, բացահայտել աշխարհը և բարձրանալ նորանոր գագաթներ»։
Իսկ Մայա Մոսիկյանը ստացավ «Անպարտելի Լեռնային Դարպասապահ» անվանակարգի հավաստագիր՝ հետևյալ բովանդակությամբ․ Սույնով հավաստվում է, որ Մայա Մոսիկյանը հանդիսանում է «4 գագաթ լեռնային ակումբի» ամենահուսալի դարպասապահը, ով կարող է պաշտպանել ոչ միայն ֆուտբոլային դարպասը, այլև արշավային խումբը՝ քամուց, ձնից, քարաթափումներից ու նույնիսկ մոլորված արջերից։ Ցածր թթվածնային գոտում ցուցադրել է արագ ռեակցիա, երկաթյա նյարդեր և կատվի ճարպկություն։ «Անպարտելի Լեռնային Դարպասապահ» անվանակարգի հավաստագիրը շնորհվում է Մայա Մոսիկյանին՝ նրաանվրեպ ռեֆլեքսների, թիմային ոգու և արշավային ֆուտբոլի պատմության մեջ թողած լեգենդար ներդրման համար։
Այս հավաստագրերը ոչ միայն հաճելի անակնկալ էին երեխաների համար, այլև կարևոր հիշեցում, որ լեռնագնացության ճանապարհին կարևոր են ոչ միայն ֆիզիկական պատրաստվածությունը և հաղթահարած գագաթները, այլև ընկերությունը, հումորը, ստեղծագործ միտքը և թիմային ոգին։ Ակումբի յուրաքանչյուր արշավ ու միջոցառում վերածվում է արկածային պատմության, որտեղ յուրաքանչյուր մասնակից թողնում է իր առանձնահատուկ հետքը։
